Mickoski: BE-ja mbetet qëllimi ynë, por duhet të mësohemi të fitojmë në Uashington, Bruksel, Berlin, Paris
BE-ja ishte, është dhe do të mbetet qëllimi ynë, por për fat të keq, ne jemi i vetmi vend në Evropë që nuk ka sfida të bazuara në arritje ose lloje të tjera kriteresh që vlejnë për vendet e tjera që janë bërë ose janë në proces të bërjes shtete anëtare, tha kryeministri Hristijan Mickoski […]
BE-ja ishte, është dhe do të mbetet qëllimi ynë, por për fat të keq, ne jemi i vetmi vend në Evropë që nuk ka sfida të bazuara në arritje ose lloje të tjera kriteresh që vlejnë për vendet e tjera që janë bërë ose janë në proces të bërjes shtete anëtare, tha kryeministri Hristijan Mickoski sot në Samitin Maqedonia 2025, transmeton Portalb.mk.
Për ne, vuri në dukje ai, ato kritere janë të një natyre krejtësisht të ndryshme.
“Disa nga ato lëshime të bëra në të kaluarën nga një numër i madh politikanësh janë rezultat i disa proceseve në të cilat ata vetë u hyjnë dhe u ngjitën pas murit dhe nuk kishin ku të shkonin, pjesërisht nga mendjelehtësia dhe naiviteti, dhe pjesërisht nga dëshpërimi kombëtar dhe moskujdesi për sakrificën e bërë në të kaluarën, as nuk patën mundësinë të kishin vizion për të ardhmen. Dhe tani, kjo Qeveri duhet të jetojë me të gjitha këto dhe të luftojë për të rifituar një pjesë të asaj hapësire që dikush e kishte zënë më parë. Është e vështirë, nuk është e lehtë, por ne do të luftojmë”, nënvizoi Mickoski.
Në atë luftë, shtoi ai, përkushtimi është absolut.
“Strategjia jonë ishte të dilnim në terren dhe të paraqisnim argumentet tona. Ky është mjeti demokratik që kemi në dispozicion, nuk kemi tjetër. Ne jemi një nga kombet dhe shtetet më të vogla në Evropë dhe kjo është e vetmja mënyrë. Kjo do të thotë që duhet të jemi dy, tre herë më të mirë se të gjithë të tjerët nëse duam të tingëllojmë me logjikë dhe të kuptohemi nga të tjerët, dhe duhet të mësojmë të fitojmë në Uashington, Bruksel, Berlin, Paris dhe Romë… nëse duam të dërgojmë një mesazh të ndryshëm nga ai që është dëgjuar prej vitesh”, theksoi kryeministri.
Vizioni i Maqedonisë për ekonominë vendase deri në vitin 2025 është tolerancë zero ndaj korrupsionit, rritje ekonomike prej pesë përqind në vit, anëtarësim në BE dhe administratë publike efikase.
Siç tha drejtoresha ekzekutive Nikica Mojsoska Blazeski në fjalimin e saj hapës në Samit, korrupsioni është problemi më i madh në vend, por vendi ende nuk ka një konsensus se çfarë lloj ekonomie dëshiron. Biznesmenët ende perceptohen si përfitues, jo si krijues vendesh pune.
“Ka përparim në Maqedoni, por të tjerët po rriten më shpejt se ne. Ne duam një ekonomi tregu, por kërkojmë ndërhyrjen e shtetit, punëtorët kërkojnë paga më të larta, por nuk flasin për përmirësimin e aftësive të tyre. Është e lehtë të fajësosh fqinjët, qeverinë, por të gjithë kontribuojmë në prosperitetin e vendit. Kjo qeveri ka filluar reforma të dhimbshme, besoj se po shikon pak më larg se cikli zgjedhor”, theksoi Mojsoska Blazheski.
Samitin e hapi Viktor Mizo, kryetar i Bordit të Drejtorëve, i cili njoftoi ri-brendimin e Maqedonia 2025.
“Ende ka shumë punë për t’u bërë që Maqedonia të përparojë, më shumë investime të huaja, reforma në kujdesin shëndetësor dhe arsim, sundimin e ligjit, luftën kundër korrupsionit”, tha Mizo, duke theksuar bashkëpunimin e mirë me Qeverinë.
Fokusi i Samitit është në përshpejtimin e rritjes ekonomike, digjitalizimin, inteligjencën artificiale, inovacionin për një ekonomi të gatshme për të ardhmen, përafrimin e potencialit ekonomik me investimet e zgjuara dhe rolin e diasporës në rritjen kombëtare. Pjesëmarrësit do të diskutojnë gjithashtu decentralizimin e pushtetit – të ardhmen e parave, medias dhe lirisë digjitale, ripërcaktimin e strategjive, investimet e huaja direkte, si dhe edukimin e së ardhmes – duke formësuar udhëheqës, mendimtarë dhe inovatorë.
Kujtojmë se meardhjen e VMRO-DPMNE-së në pushtet ka ndryshuar edhe retorika ndaj BE-së. Tani nuk flitet për kushtin që duhet të përmbush Maqedonia e Veriut në lidhje me ndryshimin e Kushtetutës, por kryefjala e ekzekutivit është se Evropa duhet të jetë parimore dhe të mos veprojë me standarde të dyfishta. Insistimi i VMRO-DPMNE-së, dhe kushti i saj për garanci në rrugëtimin drejt BE-së, e pastaj ndryshimet kushtetuese shkon në kundërshtim me kushtin e BE-së për negociatat.
Maqedonia e Veriut duhet t’i bëjë ndryshimet kushtetuese për të vazhduar rrugën drejt BE-së. Ndryshimi kushtetutës përfshin shtimin e bullgarëve dhe etnive tjera në Kushtetutë.
Kjo vjen si rezultat i asaj që Maqedonia e Veriut pas 17 vitesh me 19 korrik të vitit 2022 filloi bisedimet qasëse me BE-në me mbajtjen e konferencës së parë ndërqeveritare, pas miratimit të propozimit francez të cilin Maqedonia e Veriut e miratoi më 16 korrik 2022.
Propozimi atë kohë u votua në parlament pa pjesëmarrjen e opozitës së atëhershme e cila tani është në pushtet.
Ndryshimi i Kushtetutës kërkon shumicë prej dy të tretash dhe negociatat me BE-në nuk do të fillojnë derisa të bëhen këto ndryshime.
