Iniciativa “Kush e ka radhën?” me kërkesë drejtuar Qeverisë për e-inspektorat, për nesër paralajmëroi protesta

Lëvizja qytetare “Kush e ka radhën” do të fillojë me etapa dorëzimin e kërkesave për zjarrin në Koçan, ku humbën jetën 61 persona. Përfaqësuesi i lëvizjes, Umer Muhamedi, në një konferencë për media para Qeverisë ka bërë të ditur se do të fillojnë me dorëzimin zyrtar në arkivë të të gjitha institucioneve që i konsiderojnë kompetente për zbatimin e kërkesave, transmeton Portalb.mk.

Ata sot kanë dorëzuar kërkesën e tyre të parë – vendosjen e një e-inspektorati, përmes të cilit do të futen të gjithë procesverbalet e inspektimeve të kryera. Sipas tij, synimi i tyre është që të gjithë të dinë nëse një objekt hotelerie është i sigurt apo jo.

“Do të jetë një ueb-faqe ku secili prej nesh do të mund që përmes emrit të lokalit të shohë se çfarë kanë konstatuar inspektimet. Në rast se shkruani emrin e subjektit dhe nuk del asgjë, do të thotë se po kryen një aktivitet që nuk është i regjistruar në regjistrat përkatës”, shpjegoi Muhamedi.

Muhamedi theksoi se kjo nuk është kërkesë e re, por është paraqitur disa javë më herët, vetëm zyrtarisht po e parashtrojnë kërkesën sepse institucionet nuk kanë reaguar kur është paraqitur publikisht.

I pyetur nëse do të bëheshin parti politike apo subjekt politik nëse kërkesat e tyre do të shpërfilleshin nga pushteti, Muamedi theksoi se aktualisht nuk kanë ambicie të tilla dhe se “janë këtu për ndryshime sistemore”, sepse, siç thotë ai, e kemi të gjithëve të qartë se kushdo që të vijë në pushtet, me një sistem të tillë, asgjë nuk do të ndryshojë.