Kim Kardashian përfundon programin juridik jo-tradicional, por rruga drejt profesionit ligjor mbetet sfiduese

Kim Kardashian ka festuar një moment të rëndësishëm në rrugën e saj drejt avokaturës me një festë madhështore, duke shënuar përfundimin e programit të saj të studimit autodidakt në drejtësi.

Megjithatë, sipas ekspertes ligjore nga Los Angeles, Goldie Schon, ajo ka ende shumë punë përpara për t’u bërë zyrtarisht avokate.

Kim nuk ka ndjekur një shkollë tradicionale juridike, por ka studiuar me ndihmën e një mentori, një proces që kërkon kalimin e disa provimeve specifike.

Ajo ka dështuar dy herë në të ashtuquajturin “Baby Bar” përpara se ta kalonte në përpjekjen e tretë, shkruan BBC.

Kohët e fundit, ajo kaloi edhe Provimin e Përgjegjësisë Profesionale, një hap i rëndësishëm për t’u lejuar të hyjë në provimin shtetëror të avokatisë në Kaliforni – një nga më të vështirët në SHBA, me një normë kalimi vetëm 55%.

Ekspertja theksoi se përgatitja për këtë provim kërkon njohuri të thella në mbi 15 fusha të ndryshme të drejtësisë dhe aftësi për të përmbledhur materiale të shumta në një periudhë të shkurtër kohe. “Është një sfidë e madhe edhe për studentët që kanë ndjekur programe tradicionale”, tha ajo.

Në ceremoninë e diplomimit, e cila u mbajt në Beverly Hills, Kim mbajti një fjalim për miqtë dhe familjen. Megjithëse ajo nuk ka ndjekur një shkollë zyrtare, momenti për të ishte simbolik dhe emocional.

Goldie beson se Kim mund të hyjë në provimin e radhës në korrik, duke përmendur se ajo mund të ketë të drejtë për akomodime të veçanta nëse ka nevoja të dokumentuara si ADHD ose disleksi.

Në fund, ekspertja uroi që, nëse Kim arrin të bëhet avokate, ajo ta respektojë profesionin dhe përpjekjet që kërkon ai.

“Shpresojmë që ta marrë seriozisht”, përfundoi ajo. “Ky është një profesion që kërkon shumë përkushtim dhe nuk duhet trajtuar si një tjetër projekt personal mediatik”.