Emri i guvernatorit të ardhshëm të Bankës Popullore të RMV-së do të dihet të hënën, ndërsa Kuvendi do ta zgjedhë atë të martën

Emri i kandidatit të preferuar të shumicës në pushtet për guvernator të Bankës Popullore të Republikës së Maqedonisë së Veriut do të dihet të hënën (19 maj), ndërsa të nesërmen duhet të dalë para deputetëve, të cilët do të votojnë për zgjedhjen e tij. Këtë sot e njoftoi kryeministri Hristijan Mickoski, duke iu përgjigjur pyetjeve gazetareske, por nuk tha se kë do të mbështesnin si parti, transmeton Portalb.mk.

Kryeministri tha se e ka diskutuar këtë temë me presidenten Gordana Siljanovska-Davkova të hënën dhe, siç shtoi ai, pret që këto bisedime të vazhdojnë dhe që qëndrimi i qeverisë të jetë i qartë deri në fund të kësaj jave.

Ai tha se kishte diskutuar edhe me kryetarin e Parlamentit Afrim Gashi që zgjedhja e Guvernatorit të Bankës Popullore të vendoset si pikë e rendit të ditës në seancën e planifikuar për 20 maj.

“Pres që Parlamenti të informohet të hënën. Ka një seancë më 20 maj. Gjithashtu bisedova me kryetarin e Parlamentit për plotësimin e rendit të ditës më 20 maj, në mënyrë që të respektohet afati”, tha sot Mickoski.

Përndryshe, afati që kryeministri thotë se do të respektohet i referohet 21 majit, kur përfundon mandati i guvernatores aktuale Anita Angelovska-Bezhoska.

Duke iu përgjigjur pyetjes se kush është i preferuari i tij, kryeministri thotë se nuk ka rëndësi, duke theksuar se ajo që mund të thotë si kryeministër është se të gjithë kandidatët që po merren në konsideratë janë të jashtëm, me përvojë dhe kandidatë për të cilët është i bindur se do të ruajnë stabilitetin makroekonomik të vendit.

Një “po” vendimtare ishte përgjigjja e shkurtër e kryeministrit në pyetjen nëse një nga kushtet nga të cilat varet mbështetja e VMRO-DPMNE-së dhe Qeverisë është mbrojtja e rreptë e kursit fiks të këmbimit të denarit, si një nga postulatet themelore makroekonomike.

Ndërkohë, në opinion përmenden disa emra si kandidatët kryesorë për këtë post. Sipas analizës së publikuar së fundmi nga TV Sitel, përmenden ish-ministrat e financave Zoran Stavreski dhe Trajko Slaveski, i cili është kryetari aktual i Këshillit të Qytetit të Shkupit.

Stavreski e ka filluar karrierën e tij në Bankën Popullore, dhe më pas u bë Sekretar Shteti, pastaj Ministër i Financave dhe Zëvendëskryeministër për Çështjet Ekonomike. Deri në vitin 2016. Biografia e tij rendit edhe përfshirjen e tij në Bankën Botërore.

Paraardhësi i tij si Ministër i Financave, Trajko Slaveski, është gjithashtu një nga emrat më seriozë për kreun e Bankës Popullore.

Përveç Stavreskit dhe Slaveskit, kandidatë të mundshëm për guvernator të ardhshëm janë Angelovska-Bezhoska aktuale dhe Maja Kadievska-Vojnovi1, anëtare aktuale e Bordit Mbikëqyrës të KIBS dhe Bordit Mbikëqyrës të Stopanska Banka Bitola.

Kujtojmë se Zoran Stavreski ka qenë i dyshuar se në periudhën janar 2012 – korrik 2014, me  paramendim e kanë shfrytëzuar detyrën zyrtare dhe autorizimin dhe për kompaninë ruse OAD Strojtransgas nga Moska kanë marrë dobi të kundërligjshme pronësore në vlerë prej 2.008.877.000.00 denarë, gjegjësisht afër 33 milionë euro, dhe në vlerë të njëjtë i kanë shkaktuar dëm Buxhetit të RM-së.