BDI reagoi për emërimin e Petar Bogoevskit drejtor në Agjencinë për Fonde Arsimore Evropiane: Një vendim i tillë është provokim

Bashkimi Demokratik për Integrim e dënon ashpër vendimin e Qeverisë për emërimin e Petar Bogoevskit si udhëheqës të Agjencisë për Fondet Arsimore Evropiane – një institucion që ka për qëllim t’i afrojë të rinjtë me vlerat evropiane, “e jo t’i ofendojë dhe t’i poshtërojë ata”. Sipas kësaj partie, emërimi i një personi i cili tërë karrierën e tij publike dhe politike e ka ndërtuar mbi fyerje dhe nënçmime ndaj shqiptarëve, paraqet një provokim të drejtpërdrejtë jo vetëm për shqiptarët në Maqedoninë e Veriut, por edhe për vetë idenë evropiane në vend, transmeton Portalb.mk.

“Veçanërisht ironike dhe tragjike është që ky individ ka qenë objekt i kallëzimeve penale pikërisht nga partitë e vLEN-it në Qeveri – dhe sot, me mbështetjen e tyre, shpërblehet me një funksion udhëheqës. Ky akt është një sinjal i qartë: fyerjet ndaj shqiptarëve jo vetëm që nuk sanksionohen, por edhe shpërblehen me pozita shtetërore. Kjo është një mesazh i rrezikshëm se kushdo që dëshiron të ndërtojë karrierë politike, mjafton ta poshtërojë popullin shqiptar. Për më tepër, besimi për të menaxhuar fondet evropiane i jepet një personi që jo vetëm ka bërë deklarata fyese ndaj shqiptarëve, por edhe ndaj vetë Bashkimit Evropian dhe vlerave të tij – çka përbën një fyerje për partnerët evropianë dhe për taksapaguesit e BE-së që financojnë këto programe. BDI bën thirrje për tërheqjen e menjëhershme të këtij vendimi të turpshëm dhe rikthimin e seriozitetit në proceset që kanë të bëjnë me integrimin evropian, arsimin dhe bashkëjetesën. Qeveria nuk guxon të lejojë që shteti të shndërrohet në një skenë për provokime të lira, në dëm të bashkëjetesës dhe perspektivës evropiane”, thonë nga BDI.

Politikani kontravers, Petar Bogoevski përmes shkrimeve të tij në rrjetet sociale ka kritikuar dhe fyer vazhdimisht shqiptarët në Maqedoninë e Veriut. Vitin e kaluar, madje ai në krye të një postimi, shqiptarëve iu drejtua me termin, “Shiptari”. Por mesa duket nga kritikat që pasuan, ai e ndryshoi këtë frazë në termin “Albanci”.