“Profesionist i përkushtuar, i lidhur ngushtë me LDK’në”, kush është Ardian Olluri kandidati për deputet i LDK’së?

Ardian Olluri do të jetë kandidat për deputet për zgjedhjet parlamentare të 9 shkurtit të vitit të ardhshëm.

Kryetari i degës së LDK’së në Lipjan, Imri Ahmeti, bëri të ditur sot se në mesin e kandidatëve për deputetë do të jetë edhe Ardian Olluri.

Olluri kishte aderuar në LDK në shtator të këtij viti. Ai tha se LDK’ja është pa dyshim adresa e duhur për ata që kanë për qëllim të kontribuojnë për zhvillimin e vendit. Olluri kishte thënë se kishte vendosur t’i bashkëngjitej LDK’së duke qenë se e kaluara e familjes së tij është e lidhur ngushtë me LDK-në.

“Ju njoftoj që kam pranuar ftesën e Lidhjes Demokratike të Kosovës që aktivitetin tim politik ta vazhdoj në radhët e saj. Lidhja Demokratike, si nismëtare e pluralizmit demokratik dhe si parti me demokraci të brendshme të dëshmuar, është pa dyshim adresa e duhur për ata aktivistë politikë që kanë për qëllim të kontribuojnë për zhvillimin e vendit dhe për përmirësimin e jetës së qytetarëve. Për më tepër, besoj fuqishëm që programi politik i LDK-së përfaqëson vërtetë rrugën e re që duhet të marrë vendi”, kishte shkruar ai në njoftimin për aderim në ‘Facebook’.