Maldrita Bardho jep dorëheqjen nga mandati, Zegjine Çaushi hyn në Kuvend

Vetëm pak orë pasi përfundoi rinumërimi i votave për qarkun e Fierit dhe marrjes së mandatit nga kandidatja socialiste Maldrita Bardho, ka ardhur dhe një reagim nga kjo e fundit.

Në një postim në rrjetet socialiste, Bardho ka deklaruar që nuk do ta pranojë mandatin e deputetes dhe do ia lëri vendin Zegjine Çaushit.

Ajo shkruan se ky vendim ka ardhur pasi sipas saj Caushi ka ‘luftuar’ shumë për Partinë Socialiste gjatë kësaj fushate.

Reagimi i Maldrita Bardhos:

Pasi ndoqa me vëmendje rinumërimin e votave për qarkun Fier, ndihem e lumtur dhe e nderuar që kontributi im i gjatë në Partinë Socialiste është vlerësuar nga bashkëqytetarët e mi dhe ata më kanë konsideruar të denjë për ti përfaqësuar në parlamentin shqiptar.

Megjithatë, unë kam marrë një vendim të rëndësishëm, që kam dëshirë ta ndaj me të gjithë, një vendim që e kam marrë përpara se të niste rinumërimi dhe që sot m’u përforcua përfundimisht.

Unë do të vijoj të kontribuoj për Partinë Socialiste dhe për Lushnjen, me të gjithë mundësitë e mia, por pa qenë pjesë e parlamentit shqiptar.

Do t’i lë me shumë kënaqësi vendin tim, koleges dhe mikes time, Zegjine Çaushi, Zegjinesë që ka luftuar ndoshta më shumë për skuadrën se sa për veten këtë fushatë, duke u vënë në shenjestër të sulmeve të pamerituara nga politika e vjeter, nga politika e përbaltjes që ka frikë nga zërat e rinj, Zegjinesë nga e cila sot më ndajnë vetëm 10 vota dhe që padyshim e meriton të jetë në sallën e Kuvendit, për të përfaqësuar të rinjtë, sidomos vajzat.

Ju falenderoj nga zemra thellësisht dhe do të jem aty për të gjithë ju që më votuat, me të njëjtin entuziazëm dhe forcë që vetëm ne socialistët kemi!