U lëshua në përdorim pika e përbashkët kufitare Tabanoc -Preshevë mes RMV-së dhe Serbisë

Ministrat e Brendshëm të Maqedonisë së Veriut dhe Serbisë, Pançe Toshkovski dhe Ivica Daçiq, sot në pikën kufitare Tabanoc-Preshevë promovuan fillimin e sistemit One Stop të kontrolleve të përbashkëta në pikën kufitare, i cili mundëson transport më të shpejtë të njerëzve, më shumë tregti, turizëm dhe miqësi midis dy vendeve, transmeton Portalb.mk.

Fillimi i këtij sistemi të kontrolleve të përbashkëta u shënua simbolikisht me nënshkrimin e Protokollit për zbatimin e kontrolleve kufitare në pikat kufitare, i cili u nënshkrua nga dy ministrat në këtë ngjarje. Njëkohësisht, sot u nënshkrua një protokoll për bashkëpunim gjatë sezonit turistik veror dhe dimëror, i cili rregullon dërgimin e ndërsjellë të zyrtarëve të policisë për të ndihmuar vendet dhe ngjarjet turistike në varësi të nevojave, i cili tashmë funksionon prej vitesh.

“Po e vëmë në praktikë atë që premtuam. Në fillim të këtij sezoni veror, po prezantojmë një sistem të përbashkët kontrolli kufitar, i cili duhet të mundësojë fluks më të shpejtë dhe më pak pritje për qytetarët tanë. Sot po fillojmë zyrtarisht të përdorim sistemin One Stop dhe jam i sigurt se koha e pritjes do të reduktohet ndjeshëm dhe transferimi i pasagjerëve në kufijtë tanë do të përshpejtohet. Sot u nënshkrua edhe protokolli për shkëmbimin e zyrtarëve të policisë brenda qendrave turistike ku kemi nevojë gjatë sezoneve turistike”, theksoi ministri Toshkovski.

“Qëllimi i këtij bashkëpunimi është thjeshtimi i procedurave të plota të kontrolleve kufitare në mënyrë që zyrtarët e policisë të vendeve të autorizohen, përveç kontrolleve kufitare të vendit të tyre, të kryejnë kontrolle kufitare në dalje të vendit. Ne thjesht po vendosim kontroll One Stop në pikën e hyrjes në vend. Me këtë ndalesë të vetme, shmanget ndalimi i panevojshëm i pasagjerëve në dalje. Ky është një hap i madh përpara, veçanërisht kur bëhet fjalë për festat e mëdha ose sezonin e verës kur një numër i madh njerëzish kalojnë kufijtë”, shpjegoi ministri serb Ivica Daçiq.

Në të njëjtën kohë, të dy ministrat diskutuan përcaktimin e bashkëpunimit në situata emergjente, siç janë zjarret, për ndihmë të ndërsjellë dhe përdorimin e burimeve në dispozicion të të dyja palëve në situata të tilla.

Kuvendi i Maqedonisë së Veriut më 24 qershor e ka miratuar propozimin për një pikë të përbashkët kufitare mes Maqedonisë së Veriut dhe Serbisë, projekt i njohur edhe si “One Stop Shop”. Për këtë projekt kanë votuar 87 deputetë “për”.

Ministri për Punë të Brendshme në Maqedoninë e Veriut, Pançe Toshkovski, më 28 maj ka paralajmëruar pika të përbashkëta kufitare edhe në kalimet kufitare me Serbinë dhe Shqipërinë, derisa po përurohej pika e përbashkët kufitare Jazhincë – Glloboçicë, mes Maqedonisë së Veriut dhe Kosovës.

Ndryshe, autoritetet e Republikës së Kosovës dhe ato të Maqedonisë së Veriut më 12 prill kanë përuruar vendkalimin e përbashkët kufitar Hani i Elezit-Bllacë. Në këtë ngjarje morëm pjesë të dy kryeministrat, Albin Kurti dhe Hristian Mickoski. Mickoski tha se kjo pikë kufitare e cila deri vonë është parë si pengesë, tashmë do të jetë lehtësim dhe bashkëpunim më i fuqishëm mes dy vendeve.

• LEXO: U përurua edhe një pikë e përbashkët kufitare me Kosovën, RMV-ja paralajmëroi pika të tilla edhe me Shqipërinë e Serbinë
• LEXO: Më 12 prill fillon “One Stop Shop” në mes Maqedonisë së Veriut dhe Kosovës
• LEXO: Qytetarët e RMV-së dhe Kosovës do vazhdojnë të presin radhë të gjata në kufi, zvarritet “One Stop Shop”