Afrim Fidani është zgjedhur kryetar i Gjykatës Supreme të RMV-së
Këshilli Gjyqësor sot zgjodhi gjyqtarin suprem Afrim Fidani për kryetar të Gjykatës Supreme të Republikës së Maqedonisë së Veriut. Fidani u zgjodh me 8 vota pro dhe 5 kundër. Kryetarja e mëparshme e Gjykatës Supreme, Besa Ademi, ishte gjithashtu kandidate, por mori vetëm dy vota, transmeton Portalb.mk. Diskutimi midis anëtarëve të Këshillit Gjyqësor gjatë zgjedhjeve […]
Këshilli Gjyqësor sot zgjodhi gjyqtarin suprem Afrim Fidani për kryetar të Gjykatës Supreme të Republikës së Maqedonisë së Veriut. Fidani u zgjodh me 8 vota pro dhe 5 kundër. Kryetarja e mëparshme e Gjykatës Supreme, Besa Ademi, ishte gjithashtu kandidate, por mori vetëm dy vota, transmeton Portalb.mk.
Diskutimi midis anëtarëve të Këshillit Gjyqësor gjatë zgjedhjeve ishte se ish-kryetarja Besa Ademi kishte dështuar në punën e saj, ndërsa për gjyqtarin Afrim Fidani ata treguan se nuk e konsideronin atë si një gjyqtar të shquar, por se ai kishte një plan veprimi specifik me afate kohore të përcaktuara saktësisht që synonin përmirësimin e situatës.
Fidani ka qenë gjyqtar i Gjykatës Supreme që nga viti 2017.
Sipas një biografie të shkurtër të publikuar në faqen e internetit të gjykatës, pasi përfundoi shkollën e mesme dhe kreu shërbimin ushtarak, në vitin 1985 Fidani u regjistrua në Fakultetin Juridik në Universitetin e Prishtinës.
Në vitin 1989 u diplomua në Fakultetin e Drejtësisë. Përvoja e punës: Nga viti 1990 deri në vitin 1996, ai punoi në arsim në detyra ligjore dhe administrative. Nga viti 1996 deri në vitin 2005, punoi në Inspektoratin Shtetëror të Punës të Republikës së Maqedonisë, si inspektor republikan i punës në fushën e marrëdhënieve të punës. Nga viti 2005 deri në vitin 2007 ishte sekretar i Komunës së Vrapçishtit – Vrapçisht. Nga viti 2007 deri në vitin 2011 ai ishte avokat me seli në Gostivar. Që nga 18 korriku i vitit 2011, është zgjedhur gjyqtar në Gjykatën e Apelit të Shkupit – Departamenti Penal.
Kujtojmë se më 30 prill anëtarët e Këshillit Gjyqësor zgjodhën Zoran Dimitrievskin dhe Tatjana Dukovskën për gjyqtarë penalë të Gjykatës Supreme. Dimitirevski dhe Dukovska janë gjyqtarë nga Gjykata e Apelit – Shkup. Në seancë, u zgjodh edhe Maja Markova për gjyqtare civile të Gjykatës Supreme, por nuk u zgjodhën kandidatët Jetmir Ajdini Boshnjakov, Natasha Savoska Dimitrovska nga Gjykata e Apelit e Shkupit dhe Rafiz Idrizi nga Gjykata e Apelit e Gostivarit.
